 دير قبطى أثرى بقبرص من القرن الخامس الميلادى عمرك سمعت عن دير قبطي للقديس أبو مقار السكندري في قبرص؟؟؟ ايون في قبرص، مش دير القديس مكاريوس السكندري اللي في البحيرة اللي أسسه نيافة أنبا باخوميوس في منطقة جبل القلالي الرهبانية و لا في وادي الريان اللي اسسه ابونا المتنيح طيب الذكر أبونا إليشع المقاري أو لنقل اعاد إحياء الرهبنة فيه عشان الدقة. الدير اللي بتكلم عنه في قبرص و تحديدا شمال قبرص أو قبرص المحتلة أو الجمهورية التركية لشمال قبرص زي ما بيسموها في تركيا. النهاردة كنت قاعد شغال على اديرة و كنايس قبرص و عثرت على الدير ده بالصدفة البحتة في كتاب عامله واحد روسي عن اديرة قبرص اسمه أوليج تيشونين و منه اخدت خيط البحث!! الدير ده قبطي أسسه الرهبان الأقباط أواخر القرن التاسع و أوائل القرن العاشر يعني من اكتر من ١٠٠٠ سنة، عشان كدة حتلاقوا  الحنيات اللي داخل المباني سواء المجمع أو المعمودية أو الكنيسة فيها كتير من ستايل العمارة و المنشوبيات القبطية، زي الارشات الحائطية اللي الرهبان الأقباط كانوا بيخزنوا فيها الكتب و موجود شبهها جدا في أديرة وادي النطرون، كمان طريقة تدعيم السقف بالخشب بين طبقتين من الحجر ديه طريقة قبطية، بينما الأسوار الخارجية و الحنيات الخارجية أرمينية جدا، إيه الحكاية؟الدير حتى الإجتياح التركي لشمال قبرص في السبعينات كان دير أرميني عامر، و يستخدم ككنيسة، و كانوا و لازالوا بيسموه سيروب مجار أو مجار (مقار) فانك اي دير مقار، و لو دخلت على صفحات إخواتنا الأرمن حتلاقيهم ذاكرين إن الدير ده قبطي و إتنقل لملكيتهم في منتصف القرن الخامس عشر، يعني قعد حوالي ٥٠٠ سنة في حوزة الأقباط و ٥٠٠ سنة و يزيد في حوزة الأرمن. لو رجعنا للتاريخ حنعرف إن للأقباط أسقفية كبيرة في قبرص بين عهد الدولة العباسية التانية و حتى دولة المماليك و كان القرنين العاشر و الحادي عشر و الثاني عشر فترة إزدهار لأقباط قبرص، و ده يفسر وجود رهبان اقباط هناك و دير صخم زي ده، لكن إزدياد الإجتياح اللاتيني لقبرص (الحملات الصليبية)، و ظهور العثمانين مع سقوط القسطنطينية بدأ الوجود القبطي ينعدم في الجزيرة. التفسير المنطقي إن الأقباط لم يجدوا افضل من إخوتهم الأرمن لتسليم الدير لهم خاصة في ظل وجود اديرة بيزنطية و كاثوليكية عديدة تختلف مع الأقباط إيمانيا بينما الأرمن لهم نفس الإيمان، و سواء اشترى الأرمن الدير او تنازل الأقباط عنه للأرمن لكن ده سيظل دليل على وجود تعاون تاريخي قديم جدا بين الشعبين. الأرمن أستخدموا الدير كمحطة هامة للحجاج الأرمن في طريقهم لأورشليم، و كان الطريق من أرمينيا من خلال الاناضول (تركيا) ثم البحر، افضل و أكثر راحة من الطريق البري عبر إيران و العراق و سوريا لأنها كانت و لازالت بؤر ملتهبة و طرقها غير أمنة بسبب الصراع الشيعي السني بين الشاه الإيراني و آل عثمان. إخوتنا الأرمن حاليا صوتهم أتنبح لمطالبة السلطات التركية في شمال قبرص بعمل الترميمات و الصيانة اللازمة، لكن حجة الأتراك عدم توفر ميزانية.  أتمنى نتعاون كأقباط مع إخواتنا الأرمن و مساندتهم في الحفاظ على مكان يحمل جذور قبطية و أرمينية مشتركة. ننتظر اليوم لرفع ذبيحة مشتركة في هذا المكان الذي لازالنا نبحث عن المزيد من المعلومات التاريخية عنه، و من يدري ربما يكون نواة لدير قبطي في قبرص لو قبل إخواتنا الأرمن تأجيره لنا، فنحن أفضل من سيحافظ عليه لهم أفضل من الاتراك. على سيدنا نيافة انبا بافلوس ان يجد لنا ثلاثة او اربعة رهبان صعايدة و إحنا علينا الباقي. 😀 اللي عايز يدور على معلومات عن الدير أو فيديوهات يكتب أو يشوف دول: Sourp Magar Monastery in Halevga, Cyprus المصدر : الفيس بوك صفحة الأستاذ Mina A Mikaeel |
  | |
  | |
  | |
 | |